Բարեկամներ,
     Հայտնի է, որ «ՀՀ պետական անվտանգությանը լուրջ սպառնալիք» աներևակայելիորեն անհեթեթ ամբաստանությամբ տաս տարուց ավելի է վտարված ենք հայրենիքից: Տարիներ ի վեր դրա վերանայման և հայրենիք նույնիսկ կարճատև այցելության թույլտվության հայցերն ու մտավորական լայն զանգվածների բազմակի միջնորդությունները մնացել են ապարդյուն ( հանգամանալից. http://www.eutyun.org/S/2/AVG/AVG-2.htm ):

    Մեր 70-ամյա հոբելյանի կապակցությամբ Հայապահպան Նախաձեռնությունների Համակարգման Խորհուրդը (ՀՆՀԽ) կազմակերպել էր ստորագրահավաք և դիմել ՀՀ նախագահին ( http://www.facebook.com/events/
166758306753619/ ): Ոմանց խորհրդով և ըստ ՀՀԿ 14-րդ համագումարում ՀՀ նախագահի ելույթի հավաստիացմամբ մեր կողմից՝ նույնպես ( http://www.eutyun.org/S/2/AVG/AVG_130112_Xaxatxter.htm): ՀՀ նախագահությունից այդ զույգ հայցերը ուղարկվել էին Մշակութային Նախարարություն, որը 7.02.2013թ. գրությամբ չի առարկել «Ա.Վարպետյան-70» հոբելյանական միջոցառմանը: Այսուհանդերձ, այս առիթով հայրենիք մեր այցելության թույլտվության երկակի հայցը մնացել է անպատասխան: Ըստ ընդունված սովորույթի լռությունը ընդունելով որպես համաձայնության ակնարկ, մեզ մնում է ուղղակիորեն ժամանել հայրենիք, ինչը պատրաստվում ենք անել սույն թվի ապրիլի 4-ի առավոտյան: Առավել ևս, որ ՀՀ կառավարության 04.10.2012թ 1255-Ն որոշմամբ 10.01.2013 թվից հանված է Հայաստան Շենգենյան գոտու երկրների քաղաքացիների մուտքի վիզայի պահանջը, ինչը նաև մեր պարագան է: Այսուհանդերձ, չի բացառվում, որ այսքանից հետո սահմանային անցակետում մեր մուտքը արգելվի և Զվարթնոց օդանավակայանից մեզ հարկադրաբար վերադարձեն ելակետային երկիր, տվյալ դեպքում՝ Թուրքիա:

    Հասարկության, մեր ընթերցողների և պատկան այլ հաստատությունների առջև պարտք ենք համարում նախապես զգուշացնել այդ հավանականությունը, հույսով հնարավորինս խուսափել խիստ խնդրահարույց նման միջադեպից: Անհրաժեշտաբար նշենք, որ մեր այցելության ժամանակը բացարձակապես կապ չունի ակնկալվող քաղաքական միջոցառումների և իրադարձությունների հետ: Այն պայմանավորված է մեր հոբելյանի առթիվ հերթական հրատարակության հրատապ աշխատանքներով: Հավելենք նաև, որ ինչպես նախօրոք ազդարարել էինք, ազնիվ կլիներ «պետական անվտանգությանը սպառնալիքի» մեր «ինքնալուստրացիոն» շղթան առաջինը սկսել հենց հայրենի անվտանգության ծառայություններից ( http://hetq.am/arm/news/23407/aleqsandr-varpetyan-i-gitutyun-aats-i.html ): Բարի կամքի տեր բոլորին, խնդրում ենք հնարավորինս լայն և հետևողականորեն համասփռել սույն հաղորդագրությունը: Մասնավորպես նրանց, ովքեր ստորագրահավաքով թե նաև այլ կերպ սատարել են այս միջոցառմանը և ընդհանրապես տասնամյակներ ի վեր մեր ազգամշակութային գործունեությանը: Մենք բոլորին կարող են հատուցել միայն բոլորովին անհայտ և բախտորոշ բացահայտումներով: Այդ է մեր առաքելությունը:
      
              Շնորհակալությամբ՝
  Ալեքսանդր Արորդի Վարպետյան                                                                          Մարսել, 30.03.2013թ.