|
|
 |
Վարպետյանը` ՀՀ անվտանգության դե՞մ |
Ֆրանսիայի քաղաքացի Ալեքսանդր Վարպետյանն արդեն 5 տարի է
զրկված է Հայաստան մուտք գործելու իրավունքից, սակայն չի
կարողանում պարզել դրա պատճառը (Տես նաեւ`
Ալեքսանդր Վարպետյանն արդեն 5 տարի "սեւ ցուցակում" է):
"Հետքը" նամակով դիմել էր ՀՀ ոստիկանության անձնագրային եւ
վիզաների վարչության պետին` խնդրելով հայտնել, թե որոնք են
Ա. Վարպետյանի մուտքը Հայաստան արգելելու պատճառները, եւ
թե ինչպես են արձագանքել նախկին օմբուդսմեն Լ.
Ալավերդյանի` հարցը վերանայելու առաջարկին: Վարչության
պետի տեղակալ Ս. Աղաջանյանը նամակին պատասխանել է. "2002
թ.-ից սկսած Ֆրանսիայի քաղաքացի Ալեքսանդր Վարպետյանի` ՀՀ
կացության կարգավիճակ ստանալու, ինչպես նաեւ Հայաստանի
Հանրապետություն նրա հրավերի դիմումները մերժվել են
"ՀՀ-ում օտարերկրյա քաղաքացիների իրավական կարգավիճակի
մասին" ՀՀ նախկին օրենքի 9-րդ հոդվածի եւ 25-րդ հոդվածի
12-րդ պարբերության պահանջների համաձայն:
Համաձայն 2007 թ. փետրվարի 4-ին ուժի
մեջ մտած "Օտարերկրացիների մասին" ՀՀ օրենքի 8-րդ հոդվածի
1-ին կետի գ եւ զ ենթակետերի պահանջների` ներկայումս Ա.
Վարպետյանին ՀՀ մուտքի վիզա տրամադրելու հարցը վերանայել
հնարավոր չէ":
"Օտարերկրացիների մասին" ՀՀ օրենք 8-րդ
հոդվածի ( Օտարերկրացուն Հայաստանի Հանրապետության մուտքի
վիզա տրամադրելը (ժամկետի երկարաձգման) մերժելը, մուտքի
վիզան ուժը կորցրած ճանաչելը կամ մուտք գործելն արգելելը )
1-ին կետի համաձայն` օտարերկրացուն մուտքի վիզայի
տրամադրումը (ժամկետի երկարաձգումը) մերժվում է,
տրամադրված մուտքի վիզան ուժը կորցրած է ճանաչվում կամ
մուտքը Հայաստանի Հանրապետություն արգելվում է, եթե`
գ) գոյություն
ունեն հավաստի տվյալներ, որ նա իրականացնում է այնպիսի
գործունեություն, մասնակցում, կազմակերպում կամ
հանդիսանում է այնպիսի կազմակերպության անդամ, որի նպատակն
է`
- վնաս պատճառել Հայաստանի Հանրապետության պետական
անվտանգությանը, տապալել սահմանադրական կարգը, թուլացնել
պաշտպանունակությունը,
- իրականացնել ահաբեկչական գործունեություն,
- սահմանով ապօրինաբար (առանց համապատասխան թույլտվության)
տեղափոխել զենք, ռազմամթերք, պայթուցիկ նյութեր,
ռադիոակտիվ նյութեր, թմրանյութեր, հոգեներգործուն նյութեր
կամ
- իրականացնել մարդկանց առեւտուր (թրաֆիքինգ) եւ (կամ)
անօրինական սահմանահատումներ.
զ) գոյություն
ունեն նրա կողմից Հայաստանի Հանրապետության պետական
անվտանգությանը կամ հասարակական կարգին այլ լուրջ եւ
հիմնավոր սպառնալիքներ:
Հարկ է նշել, որ զուգահեռաբար սառեցված
է 1990-ին Վարպետյանի կողմից Հայաստանում հիմնադրված եւ
պաշտոնապես գրանցված "Էություն" ազգային իմաստության
տաճարի գործունեությունը: "Ա1+"-ը 2002-ին գրել էր, թե
Վարպետյանին արգելում են ՀՀ-ում մնալ, քանի որ նա
աղանդավոր է:
"Մեզ երբեք աղանդավորության մեջ
պաշտոնապես չեն մեղադրել: 2002-ին կացության կարգավիճակ
չներկայացնելը օվիրի` Վահագն անունով տեղակալը
պատճառաբանել է "նպատակահարմար չէ" ձեւակերպմամբ, ինչը
պաշտոնապես կրկնել են 2005-ին օմբուդսմեն Լարիսա
Ալավերդյանին: Աղանդավորությունը տխմարագույն հերյուրանքն
է (երեւի օրենքին հարմարեցնելու համար...) , երբ մենք
զբաղվել ենք միմիայն գիտությամբ: Աղանդավորները գրանցված
եհովականներն են ու բազում նմանները...",- զայրացած նշում
է Ալեքսանդր Վարպետյանը:
Այսպիսով` Ա. Վարպետյանի մուտքը ՀՀ
արգելվում է արդեն 5 տարի, սակայն ինքը` Վարպետյանը, չգիտի
դրա իրական եւ անիրական պատճառները: Եվ որքան էլ "Հետքի"
նամակի պատասխանն ինչ-որ բան ասում է խնդրի մասին,
այնուամենայնիվ, անհասկանալի է, թե ինչու են աշխարհահռչակ
գիտնականի ու մտավորականի առաջ փակ մնում ՀՀ սահմանները:
Մնում է ենթադրել, որ "այս առեղծվածային խնդրականի"
բանալու կամ էլ թե "շան գլխի" (Ա. Վարպետյանի խոսքերն են)
տեղը գիտեն միայն ՀՀ նախագահն ու նրա ստորադասները: |
|
Վահե Սարուխանյան |
|
|
|
